حوزہ نیوز ایجنسی کی رپورٹ کے مطابق، وائس چیئرمین مجلس وحدت مسلمین پاکستان علامہ سید احمد اقبال رضوی نے میڈیا سیل سے جاری اپنے بیان میں سربراہ مجلس وحدت مسلمین پاکستان سینیٹر علامہ راجہ ناصر عباس جعفری کے وارنٹ گرفتاری کو حکومت کی بوکھلاہٹ اور انتقامی سیاست کا واضح ثبوت قرار دیتے ہوئے کہا ہے کہ یہ کارروائی حق و صداقت کی آواز کو دبانے کی ناکام کوشش ہے۔
انہوں نے مزید کہا کہ علامہ راجہ ناصر عباس جعفری ایک بے باک، نڈر اور اصول پسند رہنما ہیں، جو ہمیشہ مظلوموں کے حق میں اور ظالموں کے خلاف سینہ سپر رہے ہیں، ان کے جرات مندانہ مؤقف کو اس طرح کے اوچھے ہتھکنڈے متزلزل نہیں کر سکتے، ہم واضح طور پر اعلان کرتے ہیں کہ کسی بھی جبر، دھمکی یا غیر آئینی ہتھکنڈے سے ہمیں مرعوب نہیں کیا جا سکتا، ہم کل بھی حق وصداقت کے آمین تھے اور آج بھی اصول پرستی سے پیچھے نہ ہٹتے ہوئے اپنے ملک وملت کی عزت ووقار پر کوئی سمجھوتا نہیں کریں گے۔
علامہ سید احمد اقبال رضوی نے کہا کہ مجلس وحدت مسلمین پاکستان ہر حال میں اپنی اصولی اور عوامی جدوجہد کو جاری وساری رکھے گی، حکومت کو چاہیے کہ وہ غیر جمہوری ہتھکنڈوں کے بجائے عوامی مسائل کے حل پر توجہ دے اور سیاسی انتقام کی روش کو ترک کرے، ملک میں ہر طرف اندھیر نگری اور چوپٹ راج کا دور دورہ ہے، ہم اس غیر قانونی اور انتقامی کارروائی کی شدید الفاظ میں مذمت کرتے ہیں اور مطالبہ کرتے ہیں کہ وارنٹ گرفتاری کو فی الفور واپس لیا جائے، اگر حکومت نے ظلم و جبر کا راستہ نہ چھوڑا تو ہم اپنی قانونی چارہ جوئی سمیت عوامی اور جمہوری مزاحمت کا حق محفوظ رکھتے ہیں۔
آپ کا تبصرہ